Otages de France et de Navarre, veaux et génisses bonsoir!

Siam  lo 22 de novembre de 2010, e ier èra l'anniversari dei fraires Rapetou.

Sai pas per vautrei mai ier ai regachat Harry Potter a la télé. Siáu fan. Lo week end venent, coma lo vedèu que siás, tu que m'escotes, anarai au cinema veire lo 7en film.

Lo pichòt sorcièr binoclard reven per d'aventuras nòvas, es qu'enfin ganharà, es qu'enfin accomplirà la profecia revelada dins lo tòme 5 de la saga, que ditz que d'èu e Lord Voldemort, lo sorcièr que tuèt seis gents, ne deurà a la fin restar qu'un?

Harry Potter lo gentil capitarà-ti vò non de chaplar lo mechant? Es que Hermione Granger, son amiga de totjorn, e Ron Weasley lo podrán ajudar? Es que lo professor Severus Snape es tant mechant que ce que la fin de l'episòdi 6 nos va daissèt parèisser? Lo professor Snape qu'aviá, vos va ramenti, tuat lo director de Poudlard, l'escòla de magia ,Albus Dumbledore.

Tantei questiens sensa responsa que saràn enfin, dau mens a mitat, elucidadas dimecres. Diáu « a mitat » que l'adaptacien la faguèran en doei partidas, la segonda sortirà l'estieu venent.

Son pas marrits lei filmes, prenan un pauc, a de còps, de libertat 'mé l'òbra originala, mai globalament son de bòna.

Ai liegit lei libres au mens doei còps chascun, manca lei premiers que reliègi regularament, ti pren tres oras tant son corts, t'occupa un viagi en trin sens problèma.

Lo tòme 6 mi ramenti, l'aviáu liegit en una nuech, aviáu finit a 6 oras dau matin, doeis oras aprèp l'aviá un cors a la fac.

Passar d'Harry Potter ais aventuras de Frederic Mistral au país de Bertran de Born es pas tant aisit que va sembla.

Pasmens lo tipe m'espanta. Lo personagi es conçauput per que lo joine legeire si l'i posquesse identificar, un pec de 10 ans que descuerbe qu'es un sorcier, que dintra a l'escòla de magia , que s'acomplís dins seis estudis, parlavi de la fac, dins sa vida d'adolescent e tot, tot en ajant d'activitats sportivas e en combattant lei fòrças dau mau.

Es aquò que mi tua.

Lo tipe arriba a l'escòla persecutat per lei magis negres dau Lord Voldemort, passa l'annada de menar d'enquista sus ce que poiriá ben trevar l'escòla, genre un troll, una serp giganta, un complòt per eliminar tau ò tau bòn sorcièr, e puèi, notarètz, totjorn aprèp leis examens, si bate contre lo Lord Voldemort en questien!

Super sympa, lo magi negre, vendrà jamai per Pascas, ò meme tre la dintrada assajar de tuar Harry Potter.

Un gentleman, au fons, qu' aquèu Lord.

E alora que manca de cors, que perde un braç, que parte en micien emé Dumbledore, lo tipe capita seis examens. E si ne sòrte onorablament, amai!

Es de sorcelariá, vos va diáu.

La pièger escroquariá es dins lo tome 7, sensa ne dire de tròp, sabi que dins lei gents que m'escotan, n'i a que l'an pas liegit mai que l'aniràn veire dimecres, li vau pas tuar lo suspense... Juste li dire que Harry Potter muere a la fin e que lo costat escur de la magia triomfa, brèu tot dau lòng dau libre lo tipe es pas a Poudlard, forçat a l'exilh, e capita, avans que de morir doncas, de passar son diplòme!

Auriáu fach la mitat de ce que faguèt eu dau temps qu'èri a l'escòla, l'i sariáu encara.

Ò meme bensai que sariáu mòrt tre lo premier tòme, vai t'en saupre.

E aquò, de ce que pareís, es un exemple per la joinessa!

Mais c'est n'importe quoi!

Otages de France et de Navarre,

Roms, précaires et ratamars,

Veaux et génisses bonsoir!

13 jorns fa, lo Jeff si metèt a l'antesite, la manca si fa plus sentir, pasmens prenguèt 6 kilos. Siam doncas lo 13 de septembre de 2010, e l'actualitat dau week end es estada chanuda.

Au 13 de septembre de 2050, anarai doçetament sus mei 74 ans. Au soar de ma vida, prendrai de matin lo bus a l'ethanol que mi menarà au travau.

A miègjorn, lo temps de manjar un sandwich au polet reconstituit en capsulas, e sautarai dins un segond bus, que mi menarà a l'estacien de TER de la place des grands hommes, per anar en banlèga pròcha de Montpelhier, mi rendre a mon segond travau.

Encara, ai de chança.

Ben le technicien, ara ajat de 80 ans passats, que s'èra exilat a la debuta dau segle luenh de Montpelhier, pren toei lei matins sa voatura d'epòca, la R5 qu'avià joine, compatibla emé lo bio-carburant solide, que despuèi 2025 lo petròli a vengut patrimòni de l'umanitat, per anar de vila en vila cumular 4 emplecs.

Montpelhier es encara protegida de talei situaciens.

A condicien de restar dins lo centre. Despuèi lo boom dau bio-carburant deis annadas 20, l'a agut l'exòdi urban, e la gent de la vila a fugit devèrs la campanha per far crèisser la cana a sucre e lo topinambour, denreias necitas.

D'unei familhas faguèran fortuna e embauchèran larjament lei citadins, que per de salaris confortables, si faguèran paisans.

Per estre considerat coma CSP+, basta plus a l'ora d'ara que d'estre semiaire de colza bio.

Dau còp, de grands F4 si vuejèran en vila. Resti ieu dins un d'estei F4, emé ma frèma.

Leis enfants son l'estanci dau dessos, lei felens e reire-felens partèran tentar sa chança a la campanha.

Mei doei travaus, fau lo jornalista a la FIMOC, lo servici public audiovisuau de l'autonomia de Lengadòc, e tanben lo conselhier au Pôle Emploi, mi bastan larjament per viure tranquille.

Despuèi lei leis dau president socialista Aurelien Bruni-Sarkozy, l'accecien a la proprietat a venguda realitat, subretot en vila, que lei prètz l'i cabussèran.

Jeff reglèt lo problèma en viant dins son camien vintage, un Renault deis annadas 2015. Va crompèt en 2040.

Dins 5 ans, la quilha. Enfin. Ai dejà reservada ma concecien au cementèri Sant-Lazare, clausa necita per toei leis emplegats de mai de 70 ans.

Lei progrès de la medecina sonhèran un pichòt cancer generalisat 20 ans fa, crosi lei dets per estre pas tocat per la pandemia de rauma que tua dins d'unei vilas luenchanas.

Maugrat tot, la santat marcha ben, e pensi d'aguer, a la retirada, 4 bòneis annadas per reglar ma succecien.

En 2017, lei socialistas revenguèran au poder, e tenguèran sa promessa de reprèner la lei de 2010 sus l'agi de la retirada.

Pasmens, maugrat sa bòna vòlontat, e coma l'avian annonciat, posquèran pas oblidar la realitat: l'esperancia de vida aumentant, la durada deis anndas de cotisacien montèt a 45 ans.

Puèi a 46 ans 10 ans aprèp, puèi 48 ans, fins qu'a uèi.

Segon ta profecien e ton temps de travau, si pòu aqui passar mai de 50 ans au travau.

La crisi economica de la debuta dau segle e lei refòrmas sus la flexibilitat dau travau socialistas, que permetèran a França de quitar la rececien, fasquèran qu'es mon cas.

Ma fista, mi planhi pas.

Dins l'annada, veguèri morir un fum de colègas sus son luèc de travau. L'un passèt a 50 ans tot juste, sens aguer crompada sa concecien au cementèri.

Sa frèma e sa filha de 14 ans deguèran chascuna apondre un travau a sa tiera de profeciens, per si posquer crompar la plaça au cementèri.

Dau còp, faguèran un credi per que tota la familha aje sa plaça.

Sa frèma morèt davans la banca, emportada per la pandemia de rauma.

Es la vida.

6 oras 27, lo solèu tusta encara ben.

Siam a la mitat de l'estieu, pasmens si prevei un redoç dins la setmana, lei temperaturas poirian passar sota lo 42 gras a l'ombra, ce que si veguèt pas despuèi 2035...

D'aqui d'ailà, mi resta encara un reportagi de montar sus lei reacciens dei montpelhierencs a la mesa en plaça deis annoncias de TER en castilhan. Vasta garolha...

Akhenaton, autor-compausitor-interprèta, cineasta... e ara autor. En aquèu 25 de març espelís una autobiografia dau leader dau grope marselhés IAM, Akhenaton, La Face B¹. Una autobiografia escricha a quatre mans embé Eric Mandel, jornalista au Journal du Dimanche.

Sus lo modèle de la Mauvaise réputation dau parisenc JoeyStarr (impossible de defugir la comparason, tant lei doeis òmes son importants per lo rap en França), … La Face B naissèt d'entretens emé l'artista, repartits entre leis estius de 2008 e 2009, mes en fòrma per Mandel e relegits per Akhenaton.
Ò l'istòria d'un enfant de Plan-de-Cucas tocat per la cultura hip-hop venguda de 6000 kilomètres a l'oest, èu-mesme vengut, pròchi 25 ans aprèp, un incotornable dau paisatge dau rap francés.

Lo libre commènça en septembre de 1968, a la naissènça a Marselha de Philippe Fragione, felen d'immigrants italians descendènts d'espanhòus quauquei sègles fa.
 Nos son contats sa descubèrta dau rap a la fin dei 70, sei premiers viagis a New-York a partir de 1984, son rescòntre pauc a cha pauc embé lei que formarán lo posse IAM, e puèi l'ascencion flambejanta d'una chorma autoproclamada « melhor grope de rap francés² » tre 1989 e la parucion de sa cassèta Concept, produicha per un cèrte... Massilia Sound System, la consecracion de Je danse le mia (1993, estrach de l'albòm Ombre est Lumière), suivida d'un albòm culte, vuèi disque de diamant, L'école du micro d'argent (1997), fins qu'ai darriers albòms en data (2003 e 2007) e lei projèctes en cors de l'òme que li dián tanben Abd-al-Hakim despuèi 1992.

Vos esparnharái aquí la lista de seis albòms en solitari, per vos gardar un pauc lo suspense... Pasmens èu vos esparnhará ren ò tant pauc; son enfància, urosa maugrat lo divòrci de sei gents, sa vida de boèma entre lei carrièras de New-York e lo Pòrt-Vièlh de la fin deis annadas 80, lo rap francés naissant deis annadas 90 e seis ambiènts fumants (es pas pauc dire!), son rescòntre emé sa frèma ( a cu consacra un chapitre enamorat entier de … La Face B), seis enfants, sa conversion a l'Islam sofí...

Mesme seis annadas de deprecion aprèp 2000 son evocadas (que lo mostrèran plorant davans leis eimagis fumants dau World Trade Center un cèrte jorn de 2001 -despuèi oblidèri qunte), que veirán pasmens nàisser un albòm en solitari (Sol Invictus, 2001) e un albòm d'IAM (Revoir un printemps, 2003).

Rapper engajat (dins cèrtei mesuras), politic, dau mens concernit per son sègle, Akhenaton liura aicí quauquei reflexions personalas sus la societat, ò la percepcion dei communautats musulmana ò eissudas dei diversas èrsas d'emigracion.

Dona tanben son avejaire, dins un registre autre, sus l'evolucion dau rap despuèi la debuta, si pagant mesme au passagi Laurent Bouneau, bòsso tot-podent de Skyrock, radio autoproclamada (bensai un pauc tròp lèu) Première sur le rap.

Es un pauc estranh qu'aquèu libre, a de còps tant intimista que n'es au limite de l'impudic, a d'autrei tant discrèt (per exemple degun ragòt sus NTM ò lo despart dau grope de Freeman en 2008, aprèp 20 ans a sei costats), que plonja lo legèire dins una frustracion voiosa.
A d'autrei moments nos estrangolam dau rire a la lectura de certeis anecdòtas, vò ben nos espaurugam. Un pauc estranh tanben, bòrd qu'en 20 ans e mai de disques e d'entrevistas, avèm l'imprecion de lo conòisser a Akhenaton.
Si viaja alòrs, au fieu dei paginas que fan lo libre, entre recòrds de differents tròçs dau MC, en grope ò en solò. Es d'alhors ben pensat, qu'en lei chapitres son incluits de textes entiers.

Dins lo mesme temps que lo libre, sortirà un albòm triple, simplament nomenat La Face B (La Bande Originale du Livre), fòrma de retrospectiva de sa carriera despuèi 1991. A la lectura de la tracklist pas de susprèsa, totei lei tròçs son -a una ò doeis excepcions pròchis- extrachs deis albòms passats. Lo disque sembla pas essenciau a l'auditor normau doncas, pasmens pòu constituir un bòn otís de vulgarisacion a l'adreiça dei mai joinei (ces cons!).

La Face B, la Bande Originale du Livre (3CD), sortirà en cò d'EMI au 29 de març.